Hlupu út úr brennandi húsi

Skelfing greip um sig meðal íbúa í fjölbýlishúsi við Írabakka 30 í Reykjavík laust fyrir klukkan fimm í morgun þegar mikinn reyk tók að leggja um stigaganginn.

Kallað var á slökkvilið og náðu sumir að forða sér út strax, en aðrir lögðu ekki í reykinn og lokuðust inni í íbúðum sínum og þéttu  dyrakarma fram á ganginn með blautum tuskum. Slökkviliðið sendi þegar reykkafara inn í íbúðina, þar sem eldurinn logaði og voru þrír sendir með sjúkrabílum á Slysadeild vegna gruns um reykeitrun, en engin brenndist.

Mikill eldur logaði í íbúðinni og hafði hann sprengt sér leið út um einn glugga. Tveir strætisvagnar voru sendir á vettvang til að hýsa fólkið sem yfirgaf heimili sín og verður því boðin áfallahjálp. Eldsupptök eru ókunn. Allt tiltækt slökkvilið af höfuðborgarsdvæðinu tók þátt í slökkvistarfinu, en það var rétt að ljúka slökkvistarfi í verslunarmiðstöð við Eddufell, þegar tilkynnt var um Írabakkabrunann. Í Eddufelli varð töluvert tjón, einkum í miðrými verslanasvæðisins, og þar eru eldsupptök líka ókunn.