Íbúðaverð á höfuðborgarsvæðinu hækkar

Íbúðaverð á höfuðborgarsvæðinu hækkaði um 1,6% í október og er það mesta hækkun í einum mánuði síðan í júní.

Sú hækkun kemur vegna mikillar hækkunar á verði íbúða í sérbýli en hún var upp á 2,6% á milli mánaða. Talsverðar sveiflur hafa verið á verði sérbýlis á milli mánaða. Verð í fjölbýli lækkaði aftur á móti um 1,3% á milli mánaða.

Þetta kemur fram í morgunkorni Greiningar Íslandsbanka.

Á tólf mánuðum hefur íbúðaverð á höfuðborgarsvæðinu hækkað um 7,9% að nafnvirði en um 4,1% að raunvirði. Það er mesta nafnverðshækkun húsnæðis yfir tólf mánaða tímabil sem mælst hefur síðan í mars 2012 og mesta raunverðshækkun síðan í desember 2011.

„Raunverð húsnæðis hefur nú hækkað um 9,8% frá því að það stóð lægst eftir hrunið 2008, og er það nú álíka og það var undir lok árs 2004.“ Hækkunina undanfarið má meðal annars rekja til vaxandi kaupmáttar launa, fjölgunar starfa og leiðréttingar á skuldum heimilanna.

Húsnæðisverð er þó enn um 29% lægra en þegar það var hæst fyrir hrun.

Sömuleiðis hefur velta með íbúðarhúsnæði á höfuðborgarsvæðinu aukist og á síðustu þremur mánuðum var 1.563 kaupsamningum um fasteignir þinglýst. Það eru 11,4% fleiri samningar en á sama tímabili í fyrra og var heildarveltan í þessum viðskiptum 49,7 milljarðar króna.

„Vöxtur hefur verið í veltu með íbúðarhúsnæði á höfuðborgarsvæðinu nær samfellt síðan í byrjun árs 2010 og var þinglýst 263% fleiri kaupsamningum með íbúðarhúsnæði á síðustu þremur mánuðum en á sama tíma 2009. Heildarveltan með íbúðarhúsnæði á höfuðborgarsvæðinu hefur vaxið um 294% á þessum tíma.“

Miklu skiptir fyrir fjárhag heimilanna í landinu hvernig íbúðaverð þróast. Markaðsvirði íbúðaeigna í landinu öllu er 3.263 milljarðar króna samkvæmt fasteignamati þjóðskrár og er um 125.700 íbúðir að ræða.

„Heimilin eiga sjálf um 80% af þessum eignum, en um 20% eru í eigu lögaðila á borð við Íbúðalánasjóð, banka og leigufélög.“