Stuðningur við ríkisstjórnina minnkar

Stuðningur við ríkisstjórnina fer lækkandi og hefur ekki mælst eins lítill frá kosningum samkvæmt nýjum þjóðarpúlsi Gallups. Þetta kom fram í kvöldfréttum RÚV í gær.

Núna segjast 46 prósent svarenda styðja ríkisstjórnina en þegar hún var mynduð studdu hana 62 prósent landsmanna. Fyrir mánuði síðan sögðust 50 prósent styðja ríkisstjórnina.

Fylgi Framsóknarflokksins lækkar áfram, hann mælist með 14 prósenta fylgi og hefur fylgið minnkað um 10 prósentustig frá kosningum þegar flokkurinn naut stuðnigns um fjórðungs kjósenda.

Fylgi Sjálfstæðisflokksins virðist vera nokkuð stöðugt í 27 prósentum, sem er svipað fylgi og hann fékk í kosningunum.

Þá er fylgi nýju flokkanna einnig nokkuð stöðugt milli kannana, Píratar fá 8 prósenta fylgi nú en voru með 7 síðast og Björt framtíð fær 10 prósetna fylgi, sem er eins og fyrir mánuði síðan. Þannig bæta báðir flokkar við sig fylgi frá kosningum.

Samfylkingin hefur bætt við sig tveimur prósentustigum frá síðustu könnun, mælist nú með 18 prósenta fylgi sem er 5 prósentustigum meira en í kosningunum.

Loks minnkar fylgi Vinstri grænna frá síðustu könnun, mælist nú 14 prósent en var 15 prósent í síðustu könnun.

Þeir sem taka ekki afstöðu, neita að gefa hana upp eða segjast myndu skila auðu eða sitja heima ef kosið væri í dag eru 20 prósent aðspurðra.

Tæplega 5.600 manns voru í úrtakinu og um 60 prósent svöruðu spurningunum í könnuninni.