Vilja að sveitarstjóra verði vikið frá störfum

Minnihluti sveitarstjórnar Rangárþings ytra vill að sveitarstjóranum verði tímabundið vikið frá störfum. Minnihlutinn lagði þetta til í kjölfar uppsagnar starfsmanns á skrifstofu sveitarfélagsins sem talin er ólögmæt. Tillagan var lögð fram á síðasta fundi sveitarstjórnar á föstudag en var felld með atkvæðum meirihlutans.

Drífa Hjartardóttir, sveitarstjóri Rangárþings ytra, sagði upp starfsmanninum sem er varafulltrúi minnihlutans í sveitarstjórn og var í framboði fyrir síðustu kosningar.

Í kjölfar þess að manninum var sagt upp sendu fimm starfsmenn sveitarfélagsins erindi til sveitarstjórnar varðandi starfsöryggi.

Í tillögu minnihlutans kemur fram að „vegna staðhæfinga starfsmanna eftir starfsmannafund með sveitarstjóra um að uppsögn starfsmannsins hafi verið á pólitískum forsendum, leggjum við til að sveitarstjóra verði vikið tímabundið frá starfi, á meðan rannsökuð er ástæða uppsagnar.“

Meirihlutinn felldi tillöguna og áréttaði í fundargerð að um hafi verið að ræða tímabundna heimild fyrir tilraunverkefni og ráðningu starfsmanns í það.