"Tillögur stjórnlagaráðs eru í heild sinni vondar," segir Brynjar Níelsson

Brynjar Níelsson, þingmaður Sjálfstæðisflokksins, neitar því að honum beri siðferðileg eða pólitísk skylda til að virða niðurstöðu þjóðaratkvæðagreiðslu um tillögur stjórnlagaráðs að nýrri stjórnarskrá. Hann segir tölvupósta streyma til þingmanna þar sem þeir eru spurðir hvort þeir telji ekki að þeim beri virða niðurstöðu þjóðaratvkvæðagreiðslu um tillögur stjórnlagaráðs að nýrri stjórnarskrá.

Á Facebook síðu sinni tíundar Brynjar ástæður sínar. Í fyrsta lagi segir hann stjórnlagaráð hafa verið skipað af pólitískum meirihluta Alþingis og að tillögur ráðsins beri keim af því. Hann segir þjóðaratkvæðagreiðsluna hafa verið ráðgefandi og því ekki skuldbindandi fyrir hann, „hvorki af siðferðilegum né pólitískum ástæðum.“

„Framkvæmd þjóðaratkvæðagreiðslunnar var ábótavant og þátttaka svo dræm að niðurstaðan telst vart marktæk. Svo er ég þeirrar skoðunar að samfélagssáttmála verði að gera í sæmilegri sátt,“ segir Brynjar.

Aðalástæðu sína segir Brynjar vera þá að tillögur stjórnlagaráðs séu í heild sinni vondar og til skaða fyrir íslenskt samfélag. „Þótt einhverjar hugmyndir stjórnlagaráðs séu þess virði að skoða betur voru tillögur ráðsins svo illa fram settar að þær eru ekki nothæfar með góðu móti. Um það eru stjórnlagasérfræðingar á einu máli,“ segir Brynjar.

Brynjar endar svo með að segja að til góðs væri að fara eftir þeirri stjórnarskrá sem í gildi er áður en farið  væri að semja nýja með enn óljósari ákvæðum.

Skrif Brynjars í heild sinni má sjá hér:

Nú streymir tölvupóstur til mín og annarra þingmanna þar sem við erum spurðir að því hvort við teljum það siðferðilega og pólitíska skyldu okkar að virða niðurstöðu þjóðaratkvæðagreiðslu um tilllögur stjórnalagaráðs að nýrri stjórnarskrá. Svar mitt er neitandi af eftirfarandi ástæðum:

Stjórnlagaráð var skipað af pólitískum meirihluta Alþingis og tillögur þess báru keim af því. Þjóðaratkvæðagreiðslan var ráðgefandi og því ekki skuldbindandi fyrir mig, hvorki af siðferðilegum né pólitískum ástæðum. Framkvæmd þjóðaratkvæðagreiðslunnar var ábótavant og þátttaka svo dræm að niðurstaðan telst vart marktæk. Svo er ég þeirrar skoðunar að samfélagssáttmála verði að gera í sæmilegri sátt.

Aðalástæðan er þó sú að tillögur stjórnlagaráðs eru heild sinni vondar og til skaða fyrir íslenskt samfélag. Þótt einhverjar hugmyndir stjórnlagaráðs séu þess virði að skoða betur voru tillögur ráðsins svo illa fram settar að þær eru ekki nothæfar með góðu móti. Um það eru stjórnlagafræðingar á einu máli.

Svo væri það til góðs að fara eftir þeirri stjórnarskrá sem í gildi er áður farið er að semja nýja með enn óljósari ákvæðum.