„Þú gætir alveg eins alið skordýr í gróðurhúsi eins og að rækta tómata“

„Þú gætir alveg eins alið skordýr í gróðurhúsi eins og að rækta tómata,“ segir Guðmundur Halldórsson, rannsóknarstjóri hjá Landgræðslu ríkisins. „Það væri hægt að flytja inn einhverjar af þeim tegundum sem eru borðaðar erlendis. Það má ala engisprettur í búrum. Engissprettur eru oft djúpsteiktar. Fólk þarf að láta hugmyndaflugið stjórna þessu. Við hendum alls konar mat sem væri hægt að borða.“

Sameinuðu þjóðirnar hafa ítrekað mælt með því að íbúar borði skordýr í meira mæli því í skordýrum er prótín sem ekki er verið að nýta eins vel og hægt væri. Gerð hefur verið skýrsla um skordýraát þar sem það er sett í samhengi við matvælaöryggi. Helsta fyrirstaðan er talin vera áhugaleysi Vesturlandabúa á að leggja sér skordýr til munns, jafnvel þó að um 2 milljarðar manna í heiminum borði mjög mikið af skordýrum. Fréttastofu Vísis lék forvitni á að vita hvaða skordýr Íslendingar gætu tekið upp á að borða ef þeir hefðu hug á því.

Rétt er að benda á að þeir sem hafa hug á að flytja inn skordýr þurfa að fá fyrir því leyfi. „Það geta verið tegundir sem við viljum ekki fá í íslenskt umhverfi, sem geta valdið skaða. Hver og einn sem er að gera þetta þarf að senda inn beiðni til að flytja inn viðkomandi tegund þar sem fram koma upplýsingar um möguleg skaðleg áhrif af því að flytja þetta inn.

„Að mínu viti hefur þetta aldrei verið prófað á Íslandi að borða skordýr, þó að Íslendingar borði auðvitað dýr sem eru skyld skordýrum, til dæmis rækjur.“

Guðmundur segir að hér sé minna um stór skordýr en í heitari löndum og það séu fyrst og fremst stærri skordýr sem henta best til átu. „Annars staðar þá eru borðaðar til dæmis fiðrildalirfur, bjöllulirfur og engisprettur. Það er eiginlega ekki hægt að benda á neina hópa hér sem eru sérstaklega heppilegir til átu.“

Hvað með ánamaðka?

„Það er nú sagt að einhverjir hafi nú örugglega sett ánamaðka upp í sig við veiðar. Hvort þeir borða þá beinlínis veit ég ekki. Ánamaðkar eru að mestu leyti vatn og það er ekki hættulegt að borða þá. Það væri hægt að gúgla það bara að borða ánamaðka“, segir Guðmundur aðspurður um hvaða eldunaraðferðir væru heppilegastar.

Til eru skordýr sem gætu verið með hættuleg efni í sér. „Skordýr sem eru með mjög áberandi liti. Það eru yfirleitt varúðarmerkingar vegna þess að dýrin eru eitruð eða bragðvond.“

Eru einhverja lirfur hérna sem mætti borða?

„Flestar lirfur hér eru svo litlar og það er mikið mál að safna þeim, en það væri óhætt að borða þær flestar. En það má benda á það í framhaldi með fiðrildalirfurnar að ein hefur verið mikið áberandi og er mikið af. Það er lirfa ertuiglu. Hún er með mjög áberandi viðvörunarmerkjum, gulum röndum. Sennilega eru í henni eiturefni eða bragðvond efni.“

Hér að neðan gefur að líta brot úr kvikmyndinni Konungur ljónanna. Í þessu atriði kenna Tímon og Púmba ljónsunganum Simba að meta skordýr.