Segir stjórnvöld í betri aðstöðu til að afnema gjaldeyrishöft

„Síðustu 12-18 mánuði hafa menn séð til botns í þessum vanda, skilgreint hann og við erum í betri stöðu í dag en fyrir ári síðan til að finna lausnir á þessum vanda,“ sagði Bjarni Benediktsson, fjármála- og efnahagsráðherra, þegar hann var spurður á morgunfundi VÍB hvort stjórnvöld ætli að kynna nýja raunhæfa áætlun um afnám gjaldeyrishafta.

„Ég held að stjórnvöld þurfi að hafa heildstæða hugmynd að losun hafta. Ef menn eru búnir að komast niður á sama stað. [...] Það verður takmarkaður áhugi á að kaupa íslensku bankana á meðan gjaldeyrishöftin verða við lýði," sagði Bjarni Benediktsson. 

Segir krónuna eina valkostinn í stöðunni

„Það sem ég er að segja varðandi stöðuna er að við stöndum ekki frammi fyrir valkosti um að taka upp nýja mynt," sagði Bjarni spurður um framtíðaráætlanir ríkisstjórnarinnar í gjaldeyrismálum.

Bjarni sagði að hann telji að Íslendingar hafi engan valkost annan nema að halda í krónuna.

Spurður hvort taka eigi upp aðra mynt hér á landi, sagði Bjarni:

„Ef við getum ekki einu sinni stýrt okkar eigin mynt, hvernig í ósköpunum eigum við að gera það með aðra mynt," sagði Bjarni. 



Óvíst með þjóðaratkvæðagreiðslu um aðild að ESB

Bjarni sagði einnig að ekki væri búið að slíta aðildarviðræðum við Evrópusambandið.

Hins vegar kom fram í máli hans að það sé óvíst hvort þjóðaratkvæðagreiðsla verði haldin á þessu kjörtímabili og að áframhaldandi viðræður við sambandið þurfi samþykki meirihluta Alþingis.

„Þeir sem unnu yfirburðasigur í síðustu kosningum hafa ekki á stefnuskrá sinni að ganga inn í Evrópusambandið. [...] Við höfum ekki slitið viðræðum. Það verður ákvörðun sem verður tekin af Alþingi," sagði Bjarni.