Félagsráðgjafar vilja ekki legugjöld

Stjórn Félagsráðgjafafélags Íslands harmar ákvörðun ríkisstjórnarinnar að setja eigi sérstakt legugjald á sjúklinga sem dvelja á sjúkrahúsi.

Í tilkynningu frá félaginu segir að í fjölmiðlum síðustu daga hafi komið fram að útlit sé fyrir að ákveðnir hópar muni ekki þurfa að greiða fullt legugjald.

„Engu að síður er vakin athygli á því að fólk er alla jafna ekki í þeirri stöðu að geta afþakkað innlagnir og oft er um að ræða bráðaveikindi sem ekki fara í manngreiningarálit. Sjúkrahúsdvöl veldur alltaf auknu álagi á einstakling og fjölskyldu hans og geta áhyggjur af lengd dvalar vegna aukinna útgjalda orðið til þess að trufla bataferlið,“ segir í tilkynningunni.

Stjórn félagsins hvetur stjórnvöld til að draga ákvörðunina til baka „og varar við þessari fyrirhuguðu gjaldtöku, sem er til þess fallin að mismuna fólki og auka álag á fjölskyldur sjúklinga,“ segir í tilkynningunni.