Vilja efla samstarf Íslands og Færeyja

„Engin þjóð stendur Íslendingum nær en Færeyingar,“ sagði Gunnar Bragi Sveinsson utanríkisráðherra, á fundi sem hann átti fyrr í dag með Kaj Leo Johannesen lögmanni Færeyinga.

Fundurinn var um framkvæmd Hoyvíkur fríverslunarsamningsins en markmið samningsins er að koma á fót sameiginlegu efnahagssvæði á yfirráðasvæðum Íslands og Færeyja.

Á fundi sínum ræddu ráðherrarnir viðskipti ríkjanna almennt, hvernig megi nýta betur þá möguleika sem samningurinn býður upp og greiða þannig fyrir frekari viðskiptum.

Samkvæmt tilkynningu frá utanríkisráðuneytinu skýrði utanríkisráðherra frá því að ný ríkisstjórn hefði markað mjög skýra stefnu í vestnorrænu málunum og væri vilji til að efla enn frekar hið miklvæga samstarf sem væri við grannsvæðin, Færeyjar og Grænland. Samskiptin væru þegar náin á ýmsum sviðum en stefnt væri að að auka þau enn.

Ráðherrarnir ræddu í því samhengi hvernig efla mætti samstarf Íslands og Færeyja um sameiginlega hagsmuni í sjávarútvegi.

Árið 2011 voru fluttar út vörur frá Íslandi til Færeyja fyrir 3,8 milljarða króna en árið 2012 fyrir 6,8 milljarða. Meginskýringarnar eru aukning í útflutningi á uppsjávarfiski og ýmsum iðnaðarvörum, auk þess sem útflutningur jókst á álafurðum, fiskinetum, línum og köðlum.

Innflutningur frá Færeyjum til Íslands nam tæpum 1,4 milljarð króna árið 2011 en dróst lítillega saman árið 2012 eða um eina milljón.