Mátti vísa Vítisengli úr landi

Hæstiréttur sýknaði íslenska ríkið í dag af miska- og skaðabótakröfu Jans Anfinns Wahl, meðlims í vélhjólasamtökunum Hells Angels í Noregi.

Jan stefndi íslenska ríkinu fyrir þær sakir að hafa vísað honum úr landi samdægurs og hann kom, þann 5. febrúar 2010. Við komu hans til Keflavíkurflugvallar umræddan dag leituðu tollverðir í farangri hans og fannst þá vesti merkt Hells Angels auk bols og beltis merkt sömu samtökum. Var hann í kjölfarið handtekinn og yfirheyrður, þar sem hann hélt því fram að hann hefði komið til landsins til að heimsækja land og þjóð og heilsa upp á vini í vélhjólaklúbbnum Fáfni í þrjá daga.

Taldi Jan að ákvörðun Útlendingastofnunar að vísa sér úr landi væri ólögmæt, en hún var byggð á hættumati frá ríkislögreglustjóra sem Jan taldi órökstutt og beinlínis rangt, hann hafi ekki fengið öll gögn sem matið hljóti að byggja á og ýmis lög hafi verið brotin við málsmeðferðina, þar á meðal íslenska stjórnarskráin, stjórnsýslulög og útlendingalög.

Gerði hann kröfu um 2.903 norskra króna í skaðabætur, jafnvirði tæpra 60 þúsund íslenskra króna, þar sem hann varð fyrir kostnaði við brottvísunina. Fjárhæðin byggir á upphæð flugmiða Jans fram og til baka. Þá gerði hann kröfu um 1.000.000 króna miskabætur þar sem hann var vistaður í einangrun í fangageymslum lögreglu frá því hann kom til landsins þar til honum var vísað úr landi.

Hæstiréttur leitaði ráðgefandi álits EFTA-dómstólsins um túlkun ákveðinna ákvæða útlendingalaga. Í álitinu var talið að aðild einstaklings að vélhjólasamtökum sem hefðu tengsl við skipulagða glæpastarfsemi gæti talist háttsemi sem fæli í sér raunverulega, yfirvofandi og nægilega alvarlega ógn við einhverja af grundvallarreglum samfélagsins.

Taldi dómurinn að hættumat ríkislögreglustjóra hefði ekki verið haldið annmörkum og að málið hefði talist nægilega upplýst þegar ákveðið var að vísa Jan úr landi. Íslensk stjórnvöld hefðu skilgreint afstöðu sína til Hells Angels með skýrum hætti og gripið til brottvísunarinnar í því skyni að vinna gegn starfsemi samtakka þar sem hún var talin fela í sér ógn við allsherjarreglu og almannaöryggi.