Teflt fyrir geðið

Helgi Ólafsson stórmeistari sigraði á Alþjóða geðheilbrigðismótinu, sem haldið var áttunda árið í röð, á vegum Vinaskákfélagsins í samvinnu við Taflfélag Reykjavíkur.

Keppendur voru alls 42, þar af fjórir stórmeistarar, áhugamenn af öllum stigum, og mörg efnilegustu börn og ungmenni landsins. Helgi hlaut 6,5 vinning af 7 mögulegum, en næstur kom landsliðsmaðurinn Hjörvar Steinn Grétarsson með 6 vinninga. Bronsið hreppti siðan Jóhann Hjartarson, stigahæsti skákmaður Íslands, en hann sigraði á sama móti í í fyrra.

Guðlaug Þorsteinsdóttir, margfaldur Íslandsmeistari, varð efst kvenna með 4,5 vinning, sjónarmun á undan landsliðskonunum Elsu Maríu Kristínardóttur og Lenku Ptacnikova.

Í flokki 17 ára og yngri hlutu þeir Oliver Aron Jóhannesson, Birkir Karl Sigurðsson og Gauti Páll Jónsson allir 4 vinninga, en Oliver var efstur á stigum.

Í tilkynningu segir að kempan Bragi Halldórsson hafi fengið verðlaun fyrir bestan árangur 60 ára og eldri, en hann hlaut 5 vinninga og var hársbreidd frá því að komast á verðlaunapall í heildarkeppninni.

Mótið þótti stórskemmtilegt og fór vel fram. Hrafn Jökulsson varaforseti Vinaskákfélagsins setti mótið og þakkaði góða samvinnu við TR. Þá bar hann viðstöddum kveðjur frá Kristjáni Þór Júlíussyni heilbrigðisráðherra og skákvini, og Friðriki Ólafssyni, fyrsta stórmeistara Íslendinga. Þá þakkaði Hrafn þeim hollvinum sem lögðu til veglega vinninga, en það voru Forlagið, Sögur útgáfa, Borgarleikhúsið, Þjóðleikhúsið og Saffran.

"Skákstjóri á mótinu var Róbert Lagerman, forseti Vinaskákfélagsins, en svo góður andi ríkti á mótinu að aldrei þurfti að kalla dómarann til. Vinaskákfélagið og TR þakka bakhjörlum, keppendum og öðrum þátttakendum í bráðskemmtilegum viðburði, sem orðinn er einn af fastapunktunum í íslensku skáklífi," segir ennfremur í tilkynningu.

Mótið var endapunktur geðheilbrigðisvikunnar á Íslandi 2013.