Kornsnákurinn alveg meinlaus: Froskar, leðurblökur og tarantúlur fundist

„Þetta er nú frekar algengt gæludýr sem er alveg meinlaust. Þau eru ræktuð hér á landi og ganga kaupum og sölum á milli manna. Ég gæti best trúað að þetta unga kvikindi hafi dottið úr vasa hjá viðskiptavini,“ segir Konráð Magnússon, meindýraeyðir hjá Firringu, sem fangaði og fargaði kornsnáki í verslun Krónunnar í Kórahverfinu í Kópavogi fyrr í dag.

Eins og fram kom á Vísi sá ung stúlka kornsnákinn liðast um gólfið í matvöruversluninni í dag. Þegar Konráð kom á vettvang hafði snákurinn hniprað sig saman í horni verslunarinnar.

„Þetta var svo lítið dýr, um 20 sentimetrar. Mér finnst fólk nú vera að búa til úlfalda úr mýflugu í þessu máli. Ég kramdi hann bara milli fingra mér,“ segir Konráð. Af myndbandi að dæma sem náðist af snáknum er hann þó töluvert lengri en 20 sentimetrar. 

Ýmis dýr hafa skotið upp kollinum á Íslandi síðustu ár. Má þar meðal annars nefna eðlur, froska, tarantúlur og aðrar kóngulær, leðurblökur og snáka. Það er fyrir utan flugur og mýs.

„Ég hef ekki fengið froska en allt hitt,“ segir Konráð og hlær. „Það er hópur manna hér á landi sem hefur áhuga á þessum dýrum og ræktar þau. Það má finna eðlur, tarantúlur og snáka út um alla borg. Dýrin eiga það þó öll sameiginlegt að vera algjörlega meinlaus. Ég er ekki sérfræðingur í kóngulóm en það eru tvær tegundir af tarantúlum sem við höfum séð hér á landi, brún og svört, og sú brúna sem er algengari er alveg meinlaus.“

Konráð segir að starfsfólk Krónunnar hafi brugðist hárrétt við þegar kornsnákurinn gerði vart við sig. Það hafi hringt strax í hann en ekki reynt einhvern hetjuskap með því að fanga kvikindið.

„Þó kornsnákurinn hafi verið alveg meinlaus brást starfsfólkið alveg rétt við. Það er einu sinni þannig að minnstu dýrin eru oft þau hættulegustu,“ segir Konráð.