Með haglabyssu í íþróttatösku

Lögreglan á Suðurnesjum lagði hald á haglabyssu, sem var í bifreið sem lagt var fyrir utan verslun í umdæminu um helgina. Bifreiðin var kyrrstæð og mannlaus þegar lögreglumenn komu að og sáu þeir haglabyssuna í aftursæti hennar. Byssan var í íþróttatösku en hlaup hennar skagaði út í afturrúðu bílsins.

Skömmu síðar bar eiganda byssunnar að. Hann var ekki með skotvopnaskírteini og var honum gerð grein fyrir því að svona meðferð skotvopna væri ekki í lagi, haglabyssan yrði haldlögð og lögregluskýrsla gerð um málið.

Samkvæmt upplýsingum frá Lögreglustjóranum á Suðurnesjum þarf sá sem ber vopn alltaf að vera með skotvopnaskirteini á sér. Einnig má aldrei skilja skotvopn eftir í augsýn. Maðurinn braut því vopnalög með ógætilegri meðferð vopnsins og má eiga von á sekt.