Umfjöllun um ofbeldi í skólum: Sveitarfélög geta verið skaðabótaskyld

Undanfarna daga höfum við fjallað um ofbeldi og vanrækslu í skólakerfinu og mál þar sem kennarar eða aðrir starfsmenn skóla sýna börnum slæma framkomu. Lögmaðurinn Gísli Tryggvason hefur fjallað mikið um bótaábyrgð hins opinbera og hann segir að skólar geti verið bótaskyldir í málum sem þessum. Í fimmtu grein grunnskólalaga segir að rekstur skólanna sé á ábyrgð sveitarfélaga. „Það eru fordæmi sem sýna fram á að skipuleggjendur geta orðið ábyrgir og í þessu tilviki myndu það sennilega vera sveitarfélögin sem reka grunnskólana,“ segir Gísli.

Hann segir bótaábyrgðina geta verið tvenns konar, annars vegar ef kennari eða annar skólastarfsmaður sé gerandi. „Þá kemur til svokölluð húsbóndaábyrgð sem sveitarfélagið vegna skólans ber ábyrgð á. Hins vegar er það þegar kennari eða aðrir starfsmenn skólans bregðast ekki rétt og tímanlega við ábendingum um einelti, þá getur orðið virk bótaábyrgð,“ segir hann.

Til að hægt sé að sækja bótamál gegn hinu opinbera þarf að vera hægt að sýna fram á orsakatengsl og tjón, en Gísli tekur fram að best sé ef mál sem þessi geti farið í sáttafarveg. „Vandinn í þessum málum er að það er erfitt að sýna fram á fjártjón þegar börn eiga í hlut. Það er kannski vandinn í skaðabótamálum af þessu tagi en vonandi finnst annar og betri farvegur en dómsmál og lögfræði til að takast á við þessi mál.“