Susan Sarandon í fríi á Íslandi

„Hún var alveg mjög hress. Sagðist vera nýlent á landinu,“ segir Pétur Hannesson sem rakst á stórleikkonuna Susan Sarandon í miðbænum í dag.

Pétur segir að leikkonan hafi verið hin almennilegasta og að það hefði verið lítið mál að fá að taka mynd af henni með dóttur Péturs, Sigurbjörgu Birtu, í Hjartagarðinum.

Leikkonan sagðist vera í fríi hér á landi ásamt syni sínum og unnusta. Unnusti hennar er hinn 37 ára gamli Jonathan Bricklin en Susan verður 67 ára í október.

„Við þökkuðum henni fyrir að koma með góða veðrið með sér og báðum hana um að njóta dvalarinnar,“ segir Pétur.

Voru engir stjörnustælar í leikkonunni?

„Alls engir, hún var virkilega vinaleg.“