Upplifði mikla kvenfyrirlitningu á Indlandi

„Hér eru miklir fordómar gagnvart fyrirsætum, sérstaklega þeim sem sitja fyrir á sundfötum. Meirihluti indverskra karlmanna er mjög gamaldags í hugsun. Allir heimurinn fylgist með hryllilegum ofbeldisverkum sem framin eru á konum, en mér finnst sorglegt að karlmennirnir standi ekki upp og taki afstöðu gegn þessum voðaverkum,“ segir hálf íslenska fyrirsætan Angela Jónsson í forsíðuviðtali við Nýtt Líf.

Undanfarin tvö ár hefur Angela öðlast mikla frægð á Indlandi. Hún hefur prýtt forsíður heimsþekktra tískutímarita á borð við Vogue, Elle, Harper‘s Bazaar og Maxim. Þá hefur hún fengið fjölda tilboða frá Hollywood og Bollywood. Angela segir frá lífi sínu í viðtalinu og lýsir þar hvernig hún, ólíkt öðrum inverskum stelpum, ólst upp við alþjóðlega hugsun og frelsi til að gera það sem hún vildi.

Angela hefur fengið sinn skerf af gagnrýni vegna fyrisætustarfanna í Indlandi, og upplifir oft að skrifaðar séu hatursfullar athugasemdir um myndir af henni á netinu. Hún lætur það þó lítið á sig fá og segir að í stórborgunum, eins og Bombay þar sem hún býr, hafi konur meira frelsi en úti í sveitum. „Ég veit að ég er ekki sú eina sem fæ slæma útreið á þeim vettvangi. Og sumir hafa alltaf eitthvað ljótt og leiðinlegt að segja um aðra.“

Angela er dóttir Vilhjálms Jónssonar sem lagði af stað í ferðalag frá Íslandi á áttunda áratugnum og sneri aftur þrjátíu árum síðar, konu og tíu börnum ríkari. Hann hefur ásamt indverskri eiginkonu sinni stundað hjálparstarf með föngum og heyrnalausum, rekið samyrkjubú og séð fyrir sér sem götulistamaður í Nepal, Tyrklandi og Indlandi. Vilhjálmur er einnig í viðtali í Nýju lífi.