Umfjöllun: Hvíta-Rússland - Ísland 29-23

Ísland tapaði sínum fyrsta leik í undankeppni EM 2014 eftir slæma frammistöðu í Hvíta-Rússlandi. Strákarnir eiga þó enn góðan möguleika á að vinna riðilinn.

Heimamenn voru betri á öllum sviðum í dag og voru með yfirburði í leiknum frá fyrstu mínútu. Sóknarleikur Íslands var í molum og það var ekki fyrr en á lokamínútunum að strákarnir réttu aðeins úr kútnum. En þá var sigur Hvíta-Rússlands löngu tryggður.

Íslendingar geta helst huggað sig við að liðið hafði betur í innbyrðisviðureignunum við Hvít-Rússa og verða því ofar í töflunni ef liðin enda jöfn að stigum. Ísland er með átta stig en Hvíta-Rússland sjö og dugir því okkar mönnum jafntefli á sunnudag til að tryggja efsta sætið.

Guðjón Valur Sigurðsson skoraði sjö mörk fyrir Ísland í dag og Rúnar Kárason fimm. Fjölmarga lykilmenn vantaði í íslenska liðið en Hvít-Rússar voru einnig án Siarhei Rutenka, síns langbesta leikmanns.

Jafnræði var í leiknum fyrsta stundarfjórðunginn en þá skoruðu heimamenn fjögur mörk í röð. Þeir létu forystuna aldrei af hendi eftir það.

Ísland var í tómu basli með sóknarleikinn sinn. Tapaðir boltar voru fjölmargir og skotnýtingin með versta móti. Vitali Charapenka, markvörður Hvíta-Rússlands, varði fjölmörg skot og heimamenn gengu á lagið í hraðaupphlaupunum sem urðu sjö talsins í fyrri hálfleik.

Þetta átti aðeins eftir að lagast í seinni hálfleik en strákarnir voru þó aldrei nálægt því að ógna forystu heimamanna. Hún varð mest tíu mörk og virtist engu skipta hvað heimamenn buðu upp á í sóknarleik sínum - yfirleitt hafnaði boltinn í íslenska markinu.

Markvörðurinn Aron Rafn Eðvarðsson byrjaði vel í leiknum en það dró af honum. Ernir Hrafn Arnarsson var svo besti leikmaður Íslands í seinni hálfleik.

Sem fyrr segir vantar fjölmarga leikmenn í íslenska liðið auk þess sem að margir þeirra sem spiluðu í dag hafa verið að glíma við meiðsli og skortir leikæfingu. Meðal þeirra má nefna Arnór Atlason, Rúnar Kárason og Kára Kristján Kristjánsson.

Það er þó vonandi að þeir reynsluminni sem fengu tækifærið í dag hafi lært mikilvæga lexíu því frammistaða liðsins í heild sinni var langt frá þeim gæðaflokki sem íslenska landsliðið hefur kennt sig við undanfarin ár.

Sjálfsagt hefur ekki heldur hjálpað til að Ísland hafi verið búið að tryggja sér sigur í riðlinum og mátti í raun við því að tapa þessum leik. Nú þarf „aðeins“ sigur gegn Rúmeníu í kveðjuleik Ólafs Stefánssonar á sunnudaginn til að tryggja sigur í riðlinum en það er einnig ljóst að önnur eins frammistaða eins og liðið bauð upp á í dag mun duga skammt á sunnudaginn.