Íslensk fegurð landar titlum í útlöndum

Fanney Ingvarsdóttir sem sigraði Ungfrú Ísland keppnina eftirminnilega árið 2010 tók þátt í keppninni Miss Queen of Scandinavia eða Ungfrú Skandinavía á dögunum. Við heyrðum í Fanney og báðum hana að rifja upp ævintýrið í máli og myndum eða öllu heldur símamyndum sem hún tók um borð í skemmtiferðaskipi þar sem keppnin fór fram.

Hvernig kom það til að þú fórst út í þessa fegurðarsamkeppni? „Umboðið sem sá um þessa ferð hafði samband við Silju Allansdóttur sem stýrir keppninni Ungfrú Vesturland sem hafði síðan samband við okkur. Það voru nokkrir titlar í boði en keppnin fór fram á skemmtiferðaskipinu Silja Symphony sem siglir á milli Stokkhólms og Helsinki svo við fengum frábært ferðalag og upplifun í leiðinni út úr þessu," svarar Fanney.

Nutu sín í botn

Hverjar fóru með þér út í keppnina? „Sigrún Eva Ármannsdóttir og Sigríður Dagbjört Ásgeirsdóttir fóru með mér fyrir Íslands hönd. Við nutum okkar ótrúlega vel. Við þrjár ásamt stelpum frá Svíþjóð, Finnlandi, Noregi og Danmörku vorum að keppa um titlana. Við vorum allt í allt um 30 stelpur sem við náðum að kynnast ágætlega á þessum stutta tíma. Þetta var rosalega gaman, mikið og margt sem gerðist svo lítið var um svefn og rólegheit."

Spennandi keppni

Hvernig fóru svo leikar?  „Við tókum þátt á laugardeginum þar sem ég var krýnd Miss Supranational Iceland 2013, þar af leiðandi fer ég út og keppi um titilinn Miss Supranational í Hvíta Rússlandi í september. Mjög spennandi og rosalega flott keppni sem er borin mikil virðing fyrir," segir Fanney.

Pökkuðu keppninni saman

„Sigrún var krýnd Miss Bride of the World Iceland og Sigríður Miss Tourism International.  Við erum sem sagt allar á leiðinni út í heim að taka þátt fyrir Íslands hönd og öðlast ný tækifæri og fá að ferðast.  Það er alltaf stór partur af þessu. Reynslan og upplifunin sem að maður fær aldrei til baka. Það er alltaf komið rosalega vel fram við mann í svona keppnum á erlendri grundu. Það er allt svo miklu stærra."

Fegurðarbransinn allt annar í útlöndum

„Þessi fegurðarbransi er svo allt annar en hérna heima. Maður verður helst að fara erlendis til að geta notið sín með titlana," segir hún og hlær.

„Þetta er miklu stærra úti. Á sunnudeginum var svo Ungfrú Svíþjóð keppnin haldin, eins ótrúlega skrítið og það hljómar að þá áttum við líka að taka þátt í því.  Við vorum að sjálfsögðu ekki að keppa um neina titla þar en við tókum þátt í sýningunni eins og stelpurnar sem voru að taka þátt. Þetta var rosalega gaman, stutt og laggott og okkur hlakkar rosalega til að fara út í haust. Nýta titilinn sem mest, fá að ferðast og öðlast ný tækifæri sem maður fengi annars ekki," segir Fanney.