Kanna skráningu Landsbankans á alþjóðlegum markaði

Bankasýsla ríkisins er að meta kosti og galla þess að skrá eignarhlut ríkisins í Landsbankanum tvíhliða á innlendum og alþjóðlegum markaði. Þetta kemur fram í ársskýrslu Bankasýslunnar. Bankasýslan mun einnig vega og meta kosti þess að selja eignarhluti til innlendra lífeyrissjóða, annarra fagfjárfesta eða sérhæfðra alþjóðlegra fjárfesta í fjármálafyrirtækjum.

Í ársskýrslunni segir: „Bankasýslan mun hvort tveggja meta kosti og galla (a) einhliða skráningar á innlendum markaði og (b) tvíhliða skráningar á innlendum og alþjóðlegum markaði. Endurreisn íslensks hlutabréfamarkaðar gefur tilefni til aukinnar bjartsýni, en frá því að stofnunin birti stefnu sína 16. mars 2012 hafa fimm félög ráðist í nýskráningar á hlutabréfum á innanlandsmarkaði.

Bankasýslan hefur hingað til talið lítinn ávinning í því, að ráðast í jafn stóra nýskráningu eins og á hlutum í Landsbankanum, á meðan nýskráningar eru fáar og verðmat á hlutabréfum í viðskiptabönkum er lágt.

Stofnunin hefur jafnframt vakið athygli á því, að ef ráðist yrði í sölu á hlutabréfum ríkisins í Landsbankanum skv. fyrirliggjandi söluheimild á 27,9% hlut á bókfærðu virði hlutafjár, þá næmi andvirði sölunnar 62,6 milljörðum kr. Til samanburðar má geta, að söluandvirði þeirra fimm nýskráninga sem átt hafa sér stað frá 2011 og vitnað er í að ofan, var samtals 41,2 milljarða kr.

Verður að meta kosti og galla einhliða og tvíhliða skráningar með fyrrgreindar fjárhagsstærðir að leiðarljósi, þannig að ríkið, sem seljandi, fái viðunandi verð, og að verðmyndun á eftirmarkaði verði ásættanleg fyrir alla aðila. Telur Bankasýslan því afar mikilvægt að kanna tvíhliða skráningu á hlutabréfum Landsbankans, þ.e. skráningu bæði á erlenda og innlenda markaði. Styður t.d. batnandi hlutabréfaverð viðskiptabanka á evrópskum og bandarískum mörkuðum við slíka viðleitni. Ef líta á til tvíhliða skráningar á hlutabréfum í Landsbankanum, telur stofnunin einnig mikilvægt að skrá hlutabréfin á „alþjóðlegan“ markað, frekar en „erlendan“ markað, þar sem bankinn hefur einnig ástæðu til að sækja á. Yfirleitt fer vel á að skrá hlutabréf á markað þar sem útgefandinn, annaðhvort sækir fjármögnun sína, eða hefur starfsstöðvar. Í þessu sambandi má því ekki útiloka skráningu hlutabréfanna á bandarískum markaði, þar sem hlutabréf banka frá mörgum löndum eru skráð, og íslenskir aðilar, t.d. ríkissjóður, sækja í auknum mæli fjármögnun sína.“

Kanna einnig sölu til erlendra fjárfesta

Þá kemur fram að Bankasýslan muni einnig vega og meta kosti þess að selja eignarhluti til innlendra lífeyrissjóða, annarra fagfjárfesta eða sérhæfðra alþjóðlegra fjárfesta í fjármálafyrirtækjum. Fagfjárfestar gætu tekið þátt í útboði í tengslum við skráningu hluta á markað. Bankasýslan mun þó íhuga vandlega tilhögun á sölu hluta til einstaklinga og stofnana í sama ferlinu.

Í skýrslunni segir: "Sala á ráðandi hlut til fagfjárfesta færi væntanlega fram að undangengnu opnu söluferli. Þess ber að geta, að þar sem allir fjárfestar, sem vilja eignast ráðandi hlut í fjármálafyrirtæki, þurfa að vera metnir hæfir eigendur af FME, skv. lögum um fjármálafyrirtæki, getur slíkt ferli verið tímafrekt. Hins vegar er einn helsti kostur þess að setja eignarhluti í opið söluferli, að ákveðin vissa fæst um verð eignarhlutarins, þar sem verðhugmyndir myndast snemma í söluferlinu.

Eins og rætt var um hér á undan, kemur einnig til greina, að sala á eignarhlut í opnu söluferli geti verið hluti af svokölluðu tvíbreiðu söluferli. Sala á tilteknum hlut til fagfjárfesta gæti einnig verið undanfari skráningar á markað og jafnvel auðveldað sölu á frekari eignarhlut til erlendra banka." Sjá nánar hér.