Í undirmeðvitund Eyjamanna að vera illa við KR-inga

Stórleikur fer fram í Vestmannaeyjum í dag þegar ÍBV tekur á móti KR í fjórðu umferð Pepsi-deild karla. KR er í efsta sæti deildarinnar með fullt hús stiga eftir þrjá leiki en ÍBV er með sjö stig.

Á stuðningsmannasíðu Eyjamanna, Eyjamenn.com, er greint frá því að það sé í undirmeðvitund Eyjamanna að vera illa við KR-inga. Þar er rifjað upp að í fyrsta leik þessara félaga fyrir um 100 árum hafi framganga KR-inga, sem þá léku undir nafninu FR, verið það harkaleg að margir leikmenn KV (nú ÍBV) hafi meiðst.

„Meira var hugsað um að hlaupa á manninn en leika boltanum. Sumir voru brenglaðir fyrir leikinn og sumir orðið að ganga úr leik meðan á leik stóð svo að uppi stóðu aðeins sjö leikmenn. Svo hætt var við frekari keppni og farið með næsta póstskipi til Eyja,“ segir á heimasíðu stuðningsmanna Eyjamanna.

„Síðan þá hefur það líklega fest sig í undirmeðvitund okkar Eyjamanna að vera illa við KR-inga enda okkar fyrstu kynni af þeim ekki beint þau blíðustu.“

Leikur liða hefst kl. 17:00 í dag og má búast við spennandi leik.