Guðjón Heiðar leggur skóna á hilluna

Skagamaðurinn Guðjón Heiðar Sveinsson hefur spilað sinn síðasta leik á ferlinum því þessi vinstri fótar bakvörður hefur ákveðið að leggja skóna á hilluna. Hann mun því ekki leika meira með Skagaliðinu í Pepsi-deildinni á þessu tímabili. Þetta kemur fram á heimasíðu Skagamanna.

„Ég er búinn að vera í þessu síðan árið 2000 svo ferillinn hjá manni spannar einhver 13 ár. Það er kannski helst tímaskortur sem orsakar það að ég hef tekið þessa ákvörðun, en ég er auðvitað í fullri vinnu með boltanum, svo er ég í fjarnámi í byggingariðnfræði við HR auk þess sem maður er auðvitað með stóra fjölskyldu en við frúin eignuðumst okkar fjórða barn í febrúar mánuði síðastliðnum," sagði Guðjón Heiðar Sveinsson í viðtali við heimasíðu ÍA.

Guðjón Heiðar Sveinsson hefur leikið 138 leiki með ÍA í efstu deild og varð Íslandsmeistari með liðinu 2011. Hann lék 9 leiki í Pepsi-deildinni í fyrra en var ekki búinn að spila neitt með liðinu á þessu tímabili.

„Félagið kveður Gutta með söknuði enda hefur hann verið afar traustur leikmaður hjá Skagaliðinu og í senn toppdrengur innan vallar sem utan," segir ennfremur í fréttinni á heimasíðu ÍA.