Ólafur best klæddi þjálfarinn | Þorvaldur neðstur

Sindri Snær Jensson, markvörður og sérfræðingur um tísku, hefur tekið út klæðaburð þjálfaranna í Pepsi-deild karla.

Niðurstöðuna birtir hann á heimasíðu sinni en í stuttu máli er Ólafur Kristjánsson, þjálfari Blika, öruggur sigurvegari í úttekt hans.

„Hann kemur í mark mörgum kílómetrum á undan kollegum sínum og ber höfuð og herðar yfir aðra þjálfara þegar kemur að klæðaburði,“ skrifar Sindri Snær meðal annars um Ólaf.

Rúnar Kristinsson, KR og Magnús Gylfason hjá Val koma næstir en næstu menn á eftir eru jafnir í sætum 4-10.

Fallsætin verma þeir Páll Viðar Gíslason hjá nýliðum Þórs og Þorvaldur Örlygsson, þjálfari Fram.

„Þorvaldur vermir botnsætið aðallega vegna einnar ástæðu, dúnúlpan. Því miður er dúnúlpan frá Errea ekki að gera mikið fyrir Todda og Fram húfan í raun ekki til að bæta úr skák.“

Lestu úttekt Sindra Snæs hér.