Opnun á umdeildri brú Ólafs Elíassonar í Kaupmannahöfn frestað

Búið er að fresta opnun á umdeildri brú í Christianshavn í Kaupmannahöfn sem hönnuð er af Ólafi Elíassyni. Brúin sem ber heitið Cirkelbroen átti að vera tilbúin til notkunar í vor en búið er að fresta opnun hennar um óákveðinn tíma að því er segir í frétt í Politiken.

Það er Nordea sjóðurinn sem stendur straum af kostnaðinum við brúna en talsmenn sjóðsins neita að gefa upp ástæður fyrir þessari frestun. Brúin, sem er fyrir gangandi og hjólreiðamenn, liggur yfir eitt af síkjum Christianshavn og tengir þann borgarhluta betur við miðbæ Kaupmannahafnar.

Töluverðar deilur hafa verið um þessa brú þar sem íbúum í grennd við hana þykir hún alltof stór og skyggja á útsýni sitt.  Sjá nánar hér.

Þá telur fólk sem á báta og skútur, sem nýta síkin sem viðlegustaði, að brúin hindri aðgang þeirra að þessum viðlegustöðum.



Í Politiken koma fram vangaveltur um hvort fjárhagsörðugleikar verktakans spili hér inn í málið. Verktakinn er Phil & Sön, móðurfélag Ístaks, og er þetta fjórða verk þeirra á skömmum tíma sem frestast. Berlingske Tidende greindi frá því í mars s.l. að fjárhagsstaða Phil & Sön væri orðin svo slæm að fyrirtækinu væri í raun haldið á floti af Danske Bank.