Rauða spjaldið hárrétt ákvörðun | Myndband

Gylfi Þór Orrason, formaður dómaranefndar KSÍ, segir að Kristinn Jakobsson hafi tekið rétta ákvörðun þegar hann rak FH-inginn Guðjón Árna Antoníusson af velli í gær.

Guðjón Árni fór mjög harkalega í Ragnar Pétursson, leikmann ÍBV, með þeim afleiðingum að hann fékk nokkuð slæmt höfuðhögg - eins og sést í meðfylgjandi myndbandi.

Um óviljaverk virðist vera að ræða en Gylfi Þór segir að knattspyrnulögin taki á þessu með skýrum hætti.

„Hér áður fyrr var talað um viljandi og óviljandi brot í knattspyrnulögunum en því hefur nú verið breytt. Nú er aðeins talað um þetta í tengslum við hendi,“ sagði Gylfi í samtali við Vísi í dag.

„Ef leikmaður skapar andstæðingi sínum hættu af gáleysi, skeytingarleysi eða heift þá ber að refsa fyrir það, samkvæmt núverandi orðalagi. Leikmaðurinn á semsagt að vita það þegar hann fer í sína aðgerð að hann getur verið að skapa andstæðingi sínum mikla hættu.“

„Ef að þú horfir glöggt á myndbandið sérðu að leikmaðurinn er fyrst og fremst að hugsa um að meiða sig ekki sjálfan. Hann er lítið að hugsa um hvort hann geti skaðað andstæðinginn, þó að hann taki hann í fangið og huggi hann eftir á.“

„Viljandi eða óviljandi er því ekki aðalatriðið í þessu. Leikmenn verða að koma fram af tillittsemi við andstæðinginn. Ákvörðunin um rauða spjaldið var því hárrétt að mati dómaranefndar KSÍ.“