Gætu refsað fyrir tíst

Knattspyrnusamband Íslands hefur sent þau skilaboð til félaga hér á landi að brýna fyrir leikmönnum, þjálfurum og öðru starfsfólki að hegða sér vel á samfélagsmiðlum.

Í tilkynningu frá KSÍ segir að sambandið gæti þurft að bregðast við færslum sem komi inn á borð sambandsins. Þær geti skaðað ímynd knattspyrnunnar eða þátttakanda í leiknum og væri þá um aga- og úrskurðarmál að ræða.

Umræða um knattspyrnu á Twitter er sérstaklega virk og fjölmargir leikmenn og þjálfarar sem láta til sín taka í umræðunni.

KSÍ vísar í 18. grein laga sinna um ósæmilega framkomu hvað þetta varðar. Keppni í Pepsi-deild karla hefst á sunnudaginn en konurnar hefja leik á þriðjudagskvöldið.



18. gr. Ósæmileg framkoma18.1. Framkvæmdastjóra KSÍ er heimilt að vísa til aga- og úrskurðarnefndar atvikum sem skaðað geta ímynd knattspyrnunnar eða þeirra sem þátt taka í leiknum. Slík atvik hafa þá ekki komið fram í atvikaskýrslum dómara og/eða eftirlitsmanns á leiknum en geta verið hvers kyns ósæmileg framkoma á leikstað eða á annan hátt opinberlega.

18.2. Framkvæmdastjóri KSÍ skal skila greinargerð til nefndarinnar ásamt gögnum máli sínu til stuðnings og skal fara með slík mál eins og um kærumál sé að ræða, eins og við getur átt.