Jón Arnór hafði betur gegn Hauki

Jón Arnór Stefánsson og félagar hans í CAI Zaragoza áttu ekki í miklum vandræðum með botnlið La Bruixa d'Or í Íslendingaslag í spænsku úrvalsdeildinni í körfubolta í kvöld. CAI Zaragoza vann leikinn með 27 stiga mun 89-62.

Jón Arnór spilaði í rúmar 17 mínútur í leiknum og skoraði á þeim 11 stig auk þess að gefa 2 stoðsendingar. Hann hitti úr 2 af 3 þriggja stiga skotum sínum.

Jón Arnór virðist vera búinn að ná sér af meiðslunum sem stríddu honum lengi á þessu tímabili en þetta var þriðji leikurinn í röð þar sem hann skorar meira en tíu stig.

Haukur Helgi Pálsson spilaði í 7 mínútur með La Bruixa d'Or og skoraði á þeim tvö stig.