Simmonds samdi við ÍBV | Leikmannahópurinn klár

"Ég var að skutla honum niður á hótel," segir Óskar Örn Ólafsson formaður knattspyrnudeildar ÍBV við Vísi. Liðið hefur gengið frá samningi við hinn sókndjarfa Bradley Simmonds.

„Kominn til Íslands eftir öruggt ferðalag. Vá hvað landið er fallegt!! Kominn á hótel og snæði góðan mat," skrifaði Simmonds á Twitter greinilega spenntur fyrir Íslandsdvölinni.

Simmonds, sem er átján ára, kom til móts við ÍBV í æfingaferð liðsins á Englandi á dögunum. Hann var á samningi hjá QPR en er nú samningslaus. Hann var í láni hjá Woking í utandeildinni ensku í vetur. Hann spilar sem framliggjandi miðjumaður eða framherji.

Óskar Örn segir samið hafi verið við leikmanninn fram í miðjan júlí. Þar með sé leikmannahópur Eyjamanna klár fyrir sumarið.

„Verður maður ekki að verða bjartsýnn?" segir Óskar Örn léttur í lund.

Englendingurinn James Freny æfir einnig með ÍBV þessa dagana og ætlar að freista gæfunnar á Eyjunni fögru að sögn Óskars Arnar. Freny er frændi fyrrverandi eiginkonu David James, markvarðar ÍBV, sem tók Freny með sér til Eyja.

Freny var á mála hjá Liverpool frá átta ára aldri fram til tvítugs. Hann er framherji og nokkuð frá sínu besta formi enda tók hann sér hvíld frá knattspyrnuiðkun í fjögur ár.