Wetzlar vann fyrsta leik eftir Kára-málið

Wetzlar, fyrrum lið Kára Kristjánssonar, vann þriggja marka sigur á Frisch Auf Göppingen í þýsku úrvalsdeildinni í handbolta í kvöld. Þetta var fyrsti leikur liðsins síðan félagið sagði upp samningi íslenska landsliðsmannsins Kára Kristjánssonar.

Wetzlar tókst með þessum sigri að enda sex leikja sigurgöngu Göppingen-liðsins sem hafði ekki tapað deildarleik síðan á móti Gummersbach í febrúar. Wetzlar komst upp fyrir Göppingení töflunni með þessum flotta heimasigri.

Fannar Friðgeirsson skoraði tvö mörk fyrir Wetzlar í þessum leik en hann minnkaði muninn í 10-13 og jafnaði leikinn í 15-15. Fannar nýtti tvö af fjórum skotum sínum í leiknum.

Wetzlar lenti þremur mörkum undir í fyrri hálfleik og var 12-14 undir í hálfleik. Liðið snéri hinsvegar leiknum við í seinni hálfleiknum. Kevin Schmidt var markahæstur hjá Wetzlar með tíu mörk.