„Hverjum á að treysta ef við getum ekki treyst prestinum?“

Agnes M. Sigurðardóttir, biskup Íslands, mætti í viðtal til Morgunútvarps Rásar 2 í morgun vegna prestastefnu sem hófst í dag.

Í viðtalinu var mál Guðnýjar Jónu Kristjánsdóttur rætt, en hún sagði sögu sína í Kastljósi í síðustu viku.

Þar kom fram að Sighvatur Karlsson, sóknarprestur á Húsavík, hefði ýjað að því við hana að hún ætti að draga nauðgunarkæru á hendur skólabróður sínum til baka árið 1999.

Í kjölfar þáttarins fundaði Solveig Lára Guðmundsdóttir, vígslubiskup á Hólum, með Sighvati og var niðurstaða fundarins sú að hann hefði ekki brotið starfsreglur presta. Hann hefði hins vegar gert mistök, og að loknum fundinum sendi Sighvatur frá sér tilkynningu þar sem hann sagðist hafa beðið Guðnýju Jónu afsökunar.

Stjórnendur Morgunútvarpsins spurðu biskup hvort hann væri sáttur við þá niðurstöðu.

„Við leggjum áherslu á að við stöndum alltaf með þolandanum í öllum brotamálum. Kannski má brýna presta betur í þeim efnum. Þó margt hafi verið gert í kirkjunni til að kenna, þjálfa og fræða okkur um þessi mál þá er ekki nóg að gert. Svona mál koma upp og munu því miður væntanlega koma upp í framtíðinni, þannig að við verðum að vera betur upplýst í kirkjunni. Ég heyrði í Sighvati í síma og fór lítillega yfir málið með honum. Ég ákvað í kjölfarið að senda þjóninn á staðinn, sem er Solveig Lára.“

Útvarpsmaður spurði Agnesi hvort hún væri sátt með vinnubrögð Sighvats í málinu.

„Það er aldrei ásættanlegt að letja þolendur en kirkjan leggur áherslu á að hún styður þolendur í því sem þeir vilja gera og það var kannski það sem átti að gera þá og var ekki gert. Það er líka svolítill munur á því hvernig menn takast á við málin. Hann til dæmis í þessu tilfelli hringdi í Guðrúnu (Guðnýju) Jónu og bað hana afsökunar.“

„Fjórtán árum síðar,“ grípur þáttastjórnandi fram í.

„Fjórtán árum síðar, þegar málið kom upp núna. Það hefði auðvitað verið gott ef það hefði verið gert fyrr, en svo var ekki. Mér fannst hann takast á við þetta mál af auðmýkt og hann viðurkenndi mistök sín. Hann var miður sín.“

Ekki ástæða til áminningar

Útvarpsmaður spurði biskup þá hvaða skilaboð kirkjan væri að senda með því að áminna hann ekki eða grípa til aðgerða.

„Áminning er visst ferli hjá opinberum stofnunum. Það þarf ansi mikið til að maður sé áminntur og þetta fellur ekki undir það. En hann viðurkennir að hafa gert mistök. Það var gott að hann tók þann pól í hæðina.“

Að lokum spurði þáttastjórnandi hvort fólk gæti treyst prestinum sínum miðað við þetta.

„Hverjum á að treysta ef við getum ekki treyst prestinum?“

Viðtalið í heild sinni má hlusta í heild sinni á vef RÚV