Ná Íslandsmeistararnir að stoppa Ólafsvíkinga?

Víkingar úr Ólafsvík hafa unnið fimm fyrstu leiki sína í Lengjubikarnum og eru einir á toppi síns riðils. Stóra prófið er í hinsvegar á Leiknisvellinum í kvöld þegar þeir taka á móti Íslandsmeisturum FH.

Vikingur hefur unnið fimm fyrstu leiki sína með markatölunni 16-2 og hefur þriggja stiga forskot á á FH og Fylki sem bæði hafa tapað einum leik, FH 1-3 á móti Fylki en Árbæingar 1-3 á móti Víkingi.

Guðmundur Steinn Hafsteinsson fyrirliði Víkingsliðsins, hefur skorað sex mörk í þessum fimm leikjum en Fannar Hilmarsson (2 mörk) er sá eini sem hefur skorað meira en eitt mark.

Víkingur er að undirbúa sig fyrir sitt fyrsta tímabil meðal þeirra bestu en liðið tryggði sér sæti í Pepsi-deildinni með því að ná 2. sætinu í 1. deildinni í fyrrasumar.

Ejub Purisevic hefur farið með liðið upp um tvær deildir á tveimur árum en liðið lék í 2. deild sumarið 2010.

Leikur Víkings og FH hefst klukkan 19.00 á Leiknisvellinum í Breiðholti og það verður Gunnar Jarl Jónsson sem dæmir leikinn en hann er nýkominn heim frá Liverpool þar sem hann dæmdi leik í unglingadeild ensku úrvalsdeildarinnar.