Bíða enn eftir gögnum frá Eir

Nokkrir fyrrverandi íbúar á hjúkrunarheimilinu Eir, sem enn eiga eftir að fá greiddar um samtals tvöhundruð milljónir fyrir búseturétt, eru ósáttir við sáttarleið stjórnarinnar. Lögmaður segir gjaldþrot ekki endilega verri kostinn en mjög illa hefur gengið að fá gögn frá heimilinu til að varpa ljósi á stöðuna.

Íbúum á Eir var í síðustu viku boðið að fá langtímaskuldabréf í stað staðgreiðslu þegar íbúðum er skilað en um ellefu manna hópur sem þegar hefur skilað lyklum sínum en ekki fengið búsetturéttinn greiddan hefur einnig verið boðið upp á slíkt fyrirkomulag. Sigríður Kristinsdóttir, sem að gætir hagsmuna tveggja kröfuhafa, segir hljóðið í skjólstæðingum sínum þungt en kröfurnar eru frá nokkur hundruð þúsundum upp í tugi milljóna.

„Í fyrsta lagi telja menn að það þurfi að liggja fyrir frekari upplýsingar, meðal annars hver verður greiðandi og staðan hans er. Í öðru lagi er allt óvíst um verðmæti þessa skuldabréfs. Við höfum óskað eftir gögnum frá Eir og höfum ítrekað gert það en gengið mjög erfiðlega að fá gögnin til þess að skýra stöðuna," segir Sigríður.

Sigríður segir hópinn hafa setið hitafund á Eir í gær þar sem samningaleiðin var meðal annars rædd en fram hefur komið í fréttum að allir íbúar þurfi að samþykkja fyrirkomulagið annars stefni heimilið í nauðasamninga eða gjaldþrot. Þetta hafi mjög slæm áhrif á skjólstæðinga sína enda sé um að ræða kröfur sem greiða hafi átt síðastliðið sumar.

Fréttina í heild sinni má sjá í spilaranum hér fyrir ofan. Fréttin hefst þegar rétt rúmar ellefu mínútur eru liðnar af myndbandinu.