Hjúkrunarfræðingar fá tveggja daga frest

Frestur sem Landspítalinn gaf hjúkrunarfræðingum til að draga uppsagnir sínar til baka var framlengdur til fimmtudags, eða um tvo daga, á fundi samningsaðila sem fór fram í kvöld. Fundinum hefur verið frestað til morguns. Dragi hjúkrunarfræðingarnir til baka uppsagnir sínar í tæka tíð munu þeir fá eingreiðslu upp á allt að 30 þúsund krónur fyrir þrjá mánuði.

Elsa B. Friðfinnsdóttir, formaður Hjúkrunarfræðingafélags Íslands segir að einhverjir hjúkrunarfræðinganna sem hafi sagt upp sé búinn að finna vinnu annars staðar. „Mér skilst að einhverjir séu búnir að ráða sig annað en ég hef engar tölur í því sambandi. En auðvitað, því nær sem dregur mánaðamótum því meiri líkur eru á að fólk festi sig annarsstaðar bara til að halda launum," segir hún.

280 hjúkrunarfræðingar höfðu sagt upp störfum. Uppsagnir um 260 taka gildi 1. mars en 20 uppsagnir taka gildi 1. apríl. Elsa segist ekki vita hvort það hafi bæst í þennan hóp á undanförnum dögum.