Blaðburðarhetjan: "Ánægður að allir komust út úr húsinu á lífi“

„Fyrst og fremst er ég ánægður með að allir komust út úr húsinu á lífi," segir Sławomir Królikowski, blaðburðarmaður Fréttablaðsins sem bjargaði lífi mæðgina úr brennandi íbúð í Mosfellsbæ á sjötta tímanum í morgun.

Eftir að hafa vakið íbúa í Brekkutanga 21 og hringt á Neyðarlínuna, hélt Sławomir í dagvinnu sína hjá Esju-einingum.

„Það er gott að vera réttur maður á réttum stað," sagði Sławomir.

„Við vöknum við það að það er verið að berja á húsið hjá okkur, hundurinn tryllist," segir Hjörtur Pálsson. „Ég fer til dyra og þá er Sławomir þar. Hann segir okkur að það sé reykur á neðri hæðinni. Ég fer og klæði mig og fer út ræsi fólkið niðri. Þá koma þau akkúrat út og þá var reykurinn mikill."

„Þá héldum við að eldurinn yrði ekki meiri, en þá myndast allt í einu mikill eldhnöttur. Þetta gerist víst þegar eldurinn hefur kraumað lengi. Svo kom eldsprengja og mikill reykur. Þá kemur slökkviliðið einmitt á staðinn."

Sp. blm. Þetta var mikið bál, ekki satt?

„Svo segja þeir, mjög mikið bál. Múrhúðin úr þakinu niðri hrundi niður og allt var sviðið, ónýtt og hræðileg lykt."

Mikill eldur logaði í íbúðinni þegar slökkviliðið kom á vettvang. Slökkvistarf gekk þó vel og var reykræstingu lokið klukkan átta í morgun.

Fólkinu úr íbúðinni var ekki meint af reyk. Íbúðin og innbú eru stórskemmd. Tæknideild lögreglunnar hefur verið að störfum í íbúðinni í morgun. Eldsupptök liggja þó ekki fyrir.

Ítarlegt viðtal við Sławomir verður í kvöldfréttum Stöðvar 2 klukkan 18:30 í kvöld.