„Þetta er fyrst og fremst álit“

Bráðabirgðaálit Feneyjanefndarinnar um frumvarp að nýrri stjórnarskrá var opinberað í dag. Nefndin gerir ýmsar athugasemdir við frumvarpið og bendir á að mögulegt sé að fresta afgreiðslu þess fram á næsta þing. Kjartan Hreinn Njálsson.

Valgerður Bjarnadóttir, þingmaður Samfylkingarinnar og formaður stjórnskipunar- og eftirlitsnefndar, segir umsögn Feneyjanefndarinnar merkilega. Varðandi ábendingar nefndarinnar um að stjórnskipan í nýja frumvarpinu sé of flókin segir Valgerður að nú þegar sé búið að taka á þeim málum í breytingartillögum.

Í umsögn Feneyjanefndarinnar segir einnig að nokkur ákvæði í stjórnarskrárfrumvarpinu séu beinlínis óský. Þetta geti leitt til þess að erfitt verði að túlka ákvæði stjórnarskrárinnar, sérstaklega þegar verið er að innleiða ný lög.

„Við vitum það að þarna er verið að innleiða mjög merkileg mannréttindaákvæði. Og við vitum það að þegar við skilum þessu frá okkur í lokaskjali að þá þurfum að vera greinilegar skýringar á þessum ákvæðum," segir Valgerður.

Nefndin fagnar þeim áherslum í stjórnarskrárfrumvarpinu sem varða opið lýðræði. Engu að síður hefur nefndin áhyggjur af því að þessar hugmyndir séu ekki nægilega vel útfærðar í frumvarpinu.

„Við eigum eftir að skoða það. Þetta er eitt af því sem við höfum ekki fjallað ítarlega um í nefndinni, það er, þessar greinar um þjóðaratkvæðagreiðsluna og ráðherra, ríkisstjórn og forseta. Við biðum einmitt álits frá nefndinni um þessi ákvæði."

Þá bendir nefndin á að mögulegt sé að fresta afgreiðslu frumvarpsins um tíma á meðan nokkur ákvæði hennar eru tekin til endurskoðunar.

„Ég vona að stjórnarskráin verði samþykkt á þessu þingi," segir Valgerður. „Nefndin varð auðvitað vör við þann mikla pólitíska ágreining sem myndaðist um málið. Hún segir að kannski væri best að fresta málinu tímabundið. Þetta er fyrst og fremst álit.