Flest brot eftir hrun tengjast umboðssvikum

Fjármálaeftirlitið (FME) hefur lokið rannsókn á 205 málum tengdum bankahruninu frá árinu 2008. Þetta kom fram á blaðamannafundi FME sem nú stendur yfir.

Þar kom meðal annars fram að 66 mál voru kærð til embættis sérstaks saksóknara. Þá var 37 málum vísað til sérstaks saksóknara vegna annarra brota, en það eru til að mynda skattalagabrot eða brot er varða almenn hegningarlög.

Flest afbrotin sem FME kærði til sérstaks saksóknara vörðuðu umboðssvik en næst flest innherjasvik. Umfangsmestu brotin voru vegna markaðsmisnotkunar og umboðssvika.

Brot varðandi áhættuskuldbindingar voru umfangsmikil og kunna að hafa grafið undan fjármálalegum stöðugleika bankakerfisins að því er fram kom á fundinum. Slík brot voru 6 talsins.

Þá var undantekning að aðeins væri kært vegna eins brots í hverju tilviki. Þannig vörðuðu flest málin fleiri en eitt brot. Í fjórum tilvikum var stjórnvaldssektum beitt.

Þegar mest var störfuðu 15 starfsmenn samtímis við rannsókn svokallaðra hrunmála.

Upphaf rannsókna var mismunandi. Þannig bárust mörg mál meðal annars í gegnum tilkynningar frá slitastjórnum, einstaklingum, Kauphöll og embætti sérstaks saksóknara. Sum hver komu í gegnum skýrslu rannsóknarnefndar Alþingis.

"Við erum að ljúka ákveðnum kafla, nú fjórum árum síðar," sagði forstjóri FME, Unnur Gunnarsdóttir við þetta tilefni, en FME hefur nú lokið rannsókn á málum í þessum svokallaða hrunflokki.

98 málum var lokið án kæru.