Ronaldo og Rauði kross Íslands vinna að sama verkefni

Portúgalski knattspyrnusnillingurinn Cristiano Ronaldo og Rauði krossinn á Íslandi styðja í sameiningu endurhæfingu fatlaðs fólks í Afganistan. Um er að ræða fólk sem hefur misst útlimi eða á sökum annarrar fötlunar erfitt uppdráttar í þessu stríðshrjáða landi. Verkefnið felst í að styðja árlega um tvö þúsund manns - karla, konur og börn - þannig að þau geti aflað sér menntunar eða tekna.

Í frétt frá Rauða krossinum kemur fram að Ronaldo lætur 17 milljóna verðlaunafé frá Evrópska knattspyrnusambandinu UEFA renna til verkefnisins og Rauði krossinn á Íslandi styður það í ár um 40 milljónir króna. Ronaldo hlaut verðlaunin fyrir að hafa verið valinn í lið ársins alls sjö sinnum af lesendum vefsíðunnar uefa.com. Þetta er í annað sinn sem Ronaldo vinnur til þessara verðlauna og gefur þau til verkefnis Rauða krossins.