Gunnar Nelson upp um 44 sæti á MMA-listanum

Gunnar Nelson hoppaði upp um heil 44 sæti á nýjum Styrkleikalista í veltivigt í MMA, blönduðu bardagaíþróttum, sem birtur er á Fightmatrix vefsíðunni. Til að koma til greina þurfa bardagamennirnir að hafa keppt að minnsta kosti einu sinni á síðustu 450 dögum.

Gunnar Nelson er nú í 20. sæti á listanum eftir sigur sinn á Brasilíumanninum Jorge Santiago um síðustu helgi en Santiago er aftur á móti í 52. sæti listans. Gunnar Nelson er með 230 stig, sextán meiri en næsti maður á eftir honum og er jafnframt aðeins einu stigi á eftir manninum í 19. sætinu sem er Bandaríkjamaðurinn B.J. Penn.

31 árs gamall Kanadamaður, Georges St. Pierre, er langefstur á listanum en hann er með 1032 stig eða 445 stigum meira en næsti maður. St. Pierre hefur unnið 23 af 25 bardögum sínum á ferlinum.

Gunnar Nelson hefur nú unnið 11 bardaga í röð í MMA þar af tvo þá síðustu í UFC-bardaga. Hann vann Santiago örugglega á dómaraúrskurði á laugardagskvöldið.

Það er hægt að nálgast listann með því að smella hér.