Bankarnir herða sultarólina

Talsmenn stóru bankanna þriggja segja ljóst að ná þurfi rekstrarkostnaði þeirra niður, en samkvæmt nýútkominni skýrslu Samkeppniseftirlitsins (SE) jókst kostnaðurinn um ellefu milljarða króna á milli áranna 2011 og 2012.

Eru viðskiptavinir bankanna sagðir greiða þennan mikla kostnað dýru verði með óhagstæðum viðskiptakjörum, en skýrslan segir hann mikinn í alþjóðlegum samanburði.

„Við erum að vinna að því að ná kostnaðarhlutfallinu niður, það er ekkert leyndarmál," segir Guðný Helga Herbertsdóttir, upplýsingafulltrúi Íslandsbanka, og nefnir sameiningu við Byr sem eina af ástæðum hins mikla rekstrarkostnaðar bankans.

„Það var einskiptiskostnaður hjá okkur vegna sameiningarinnar við Byr. Með þeirri sameiningu mun nást ákveðin hagræðing á markaði, en samlegðaráhrifin munu ekki koma fram að fullu fyrr en á þessu ári."

Guðný bætir því við að eitt af lykilverkefnum bankans sé hagkvæmur rekstur og hafi ýmislegt verið gert til að lækka kostnað, s.s. endurnýjun á samningum við birgja og markvissara utanhald um kostnað hverrar deildar fyrir sig.

Hafa þegar brugðist við kostnaðinum

Kristján Kristjánsson, upplýsingafulltrúi Landsbankans, segir bankann þegar hafa brugðist við kostnaðinum, og verið sé að reyna að reka bankann með hagkvæmari hætti en áður hafi verið gert.

„Við lokuðum tíu útibúum á síðasta ári og alls höfum við lokað 18 útibúum frá hausti 2010 og hagræddum í höfuðstöðvunum í tvígang á síðasta ári," segir Kristján, en nýverið voru útibúin við Laugaveg og í Holtagörðum sameinuð í nýju útibúi í Borgartúni.

„Við munum halda áfram ýmsum aðgerðum til hagræðingar sem snúa að skilvirkari rekstri. Við getum orðað það þannig, að við séum að endurskipuleggja allt verklag og alla vinnuferla til að draga úr kostnaði."

Kristján segir erfitt að bera íslensku bankana saman við mun banka í mun fjölmennari löndum. „Stærðarhagkvæmni í bankarekstri er gríðarleg. Þú getur í raun þjónustað 100.000 manns og tvær til þrjár milljónir jafnvel með sama tölvukerfinu. Stofnkostnaðurinn er sá sami, en reksturinn kostar okkur hlutfallslega miklu meira."

Skýrslan gott umræðuplagg

Í sama streng tekur Haraldur Guðni Eiðsson hjá Arion banka, en þar er skýrsla SE sögð gott umræðuplagg sem bankinn þurfi að kynna sér betur áður en hann tjáir sig efnislega um innihald hennar.

„Við höfum verið mjög fókuseruð á kostnað á síðustu árum. Starfsmönnum var fækkað um eitt hundrað og við höfum lokað um þriðjungi útibúa. Eitt af helstu verkefnum innan bankans er að halda kostnaði niðri, en við höfum ekki greint forsendur þessara útreikninga hjá SE."

Upplýsingafulltrúarnir segja frekari lokanir útibúa ekki fyrirhugaðar í bili, og uppsagnir starfsfólks séu ekki á dagskrá. Ljóst sé hins vegar að nú þurfi að spara.