Naumur sigur Norrköping

Pavel Ermolinskij skilaði flottum tölum þegar að Norrköping vann dramatískan sigur á Örebro í sænsku úrvalsdeildinni í körfubolta.

Norrköping vann með minnsta mun, 83-82, en Mikael Lindquist tryggði sigurinn á vítalínunni þegar fjórar sekúndur voru eftir.

Örebro byrjaði miklu betur og var með tólf stiga forystu eftir fyrsta leikhluta, 25-13. Norrköping sótti á en var samt níu stigum undir þegar þrjár mínútur voru eftir.

Heimamenn gáfu svo í á lokasprettinum og rétt náðu að skríða fram úr á lokasekúndum leiksins.

Pavel Ermolinskij skoraði tólf stig, tók ellefu fráköst og gaf átta stoðsendingar og var því nálægt því að ná þrefaldri tvennu í leiknum.