Óvænt tap Kiel í Göppingen

Göppingen vann sannfærandi fjögurra marka sigur á toppliði Kiel, 33-29, í þýsku úrvalsdeildinni í handbolta í kvöld en Kiel sat í efsta sæti deildarinnar fyrir leikinn og var búið að vinna fimm deildarleiki í röð.

Aron Pálmarsson skoraði fimm mörk fyrir Kiel og Guðjón Valur Sigurðsson var með tvö mörk. Sex af sjö mörkum Íslendinganna komu í seinni hálfleik.

Göppingen skoraði þrjú fyrstu mörk leiksins og komst í 6-1 eftir rúmlega átta mínútna leik. Göppingen var 16-12 yfir í hálfleik en Kiel náði muninum niður í þrjú mörk í seinni hálfleiknum. Nær komst liðið ekki og Göppingen fagnaði frábærum sigri.

Tap Kiel þýðir að Rhein-Neckar Löwen getur náð liðunum að stigum með sigri á Flensburg-Handewitt seinna í kvöld.

Lærisveinar Dags Sigurðssonar í Füchse Berlin unnu níu marka heimasigur á TV Grosswallstadt, 30-21. Rúnar Kárason skoraði tvö mörk fyrir Grosswallstadt og Sverre Jakobsson fékk tvo brottrekstra en hann spilaði að vanda bara í vörninni. TV Großwallstadt er áfram í slæmum málum í fallsæti en Füchse Berlin styrkti stöðu sína í 4. sæti deildarinnar.

Björgvin Páll Gústavsson sat á bekknum þegar SC Magdeburg vann þriggja marka heimasigur á TBV Lemgo, 27-24. SC Magdeburg er í 7. sæti deildarinnar.