HSÍ aðstoðaði við að koma silfurpeningnum úr sölu

Einn þeirra fjórtán af þeim sem fengu silfurpening eftir að íslenska handknattleikslandsliðið lenti í öðru sæti á Ólympíuleikunum í Kína 2008, lenti í slíkum kröggum að hann setti peninginn í sölu. Í samtali við hádegisfréttir Bylgjunnar kom fram að peningurinn væri kominn úr þeirri sölumeðferð sem hann var í. Peningurinnn er ekki lengur til sölu en er þó ekki í höndum HSÍ.

Aðspurður um aðkomu samtakanna að málinu sagði Guðmundur B. Ólafsson formaður HSÍ: „Aðkoma HSÍ felst í því að það eru ákveðnar ástæður sem ollu því að þessi peningur fór í umferð og við kynntum okkur það mál. Í ljósi þess ákváðum við að það mál yrði leyst að hluta til. Það tókst og þar af leiðandi var peningurinn tekinn úr umferð.“

Guðmundur sagði þessa silfurpeninga vera eign íþróttamannanna. „Í ljósi aðdraganda þess hvernig þessi peningur komst í umferð ákváðum við að aðstoða við að koma honum úr umferð. Við teljum að hann hafi sögulegt gildi fyrir handbolta- og íþróttasöguna og þess vegna sé það mikilvægt að hann haldist innan þess hóp sem vann fyrir honum eða HSÍ. Þess vegna skiptum við okkur af þessu.“

Aðspurður hvort HSÍ myndi bregðast við því ef annar peningur kæmi til sölu segir Guðmundur: „Nei, ekki ef það er einhver vilji hjá mönnum að selja silfrið sitt, þá munum við ekkert skipta okkur frekar að því. Það yrði mjög leiðinlegt að vísu.“

Kemur til greina að varpa frekari ljósi á málið: „Við teljum að þetta sé algerlega ljóst eins og þetta liggur fyrir. Rót þess hvernig þessi peningur fór í umferð, við erum búnir að loka því máli. Við teljum málið alveg skýrt. Að finna hvaða einstaklingar eiga í hlut er algert aukaatriði.“