Leggja til hækkun á stökum sundmiða

Aðgangseyrir í sundlaugar Reykjavíkurborgar ætti að fjármagna 70 prósent af rekstrarkostnaði lauganna, öðrum en fasteignakostnaði, frá árinu 2015. Til þess að svo geti orðið þarf að auka tekjurnar um 94 milljónir á ári, sem samsvarar 170 þúsund stökum gjöldum fullorðinna í sund. Þetta kemur fram í skýrslu starfshóps borgarinnar um framtíðarsýn sundlauganna. Aðgangseyrir og aðrar tekjur sundlauganna eru nú tæplega 60 prósent af kostnaði þegar ekki er tekið tillit til fasteignakostnaðar. Heildartekjur lauganna árið 2011 voru 557,8 milljónir króna. Hópurinn áréttar í skýrslunni þrjú meginstef í gjaldskrárstefnu. Í fyrsta lagi segir hópurinn mikilvægt að standa vörð um stórnotendur og barnafjölskyldur. Í öðru lagi vill hópurinn að eldri borgarar fái ekki ókeypis í sund eins og nú er heldur fái þeir afslátt af aðgangseyri, og í þriðja lagi vill hópurinn að stök gjöld hækki til að ná fram markmiðinu. Hópurinn lagði einnig fram fjárfestingaáætlun í skýrslunni, eins og Fréttablaðið greindi frá fyrir viku. Þar eru lagðar til sjö uppbyggingartillögur. Fulltrúar Sjálfstæðisflokksins í hópnum sátu hjá við afgreiðslu skýrslunnar í starfshópnum. Þeir gerðu það einnig við afgreiðslu hennar í menningar- og ferðamálaráði ásamt fulltrúum Vinstri grænna. Marta Guðjónsdóttir, fulltrúi Sjálfstæðisflokksins, segir Sjálfstæðismenn telja forgangsröðunina í fjárfestingaáætluninni ranga. Hún segir nauðsynlegt að fagráð fái að fjalla um skýrsluna, ýmislegt þarfnist frekari skoðunar þótt margt gott sé í skýrslunni. Þar á meðal séu áform um aukna kostnaðarhlutdeild sundlaugagesta. Í bókuninni kemur það einnig fram. „Það vekur til dæmis mikla furðu að hefja eigi framkvæmdir við Sundhöll Reykjavíkur á þessu ári á sama tíma og ekki er gert ráð fyrir nema kennslulaug í Grafarholti og Úlfarsárdal og að ekki eigi að fara í endurbætur á laugarkeri í Laugardalslaug fyrr en árið 2016 en eins og margsinnis hefur verið bent á er nauðsynlegt að fara í úrbætur þar sem fyrst öryggisins vegna,“ segir í bókuninni. „Til viðbótar vilja fulltrúar Sjálfstæðisflokksins og Vinstri grænna ítreka að lögð verði áhersla á að lengja opnunartíma í stað þess að lagt verði í einstaka kostnaðarsamar framkvæmdir.“