Lauk doktorsprófi frá HÍ fyrst Afríkubúa

Pacifica F. Achieng Ogola frá Kenía varði á föstudaginn doktorsritgerð sína í umhverfis- og auðlindafræði frá Háskóla Íslands.

Pacifica er sú fyrsta til þess að ljúka doktorsprófi í hinu þverfaglega námi við HÍ en jafnframt fyrsta manneskjan frá Afríku sem brautskráist sem doktor frá skólanum.

Pacifica, sem er fædd árið 1970 í Kisumu í Kenía, kom til Íslands árið 2004. Þá stundaði hún sex mánaða nám við Jarðhitaskóla Sameinuðu þjóðanna. Hún sneri aftur hingað til lands árið 2009 til að vinna að doktorsgráðunni.

Í rannsókn sinni kannaði hún möguleg áhrif af nýtingu jarðhita á samfélagsþróun, sjálfbærni og aðlögun að loftslagsbreytingum innan ramma Þúsaldarmarkmiðanna á tveimur landsvæðum í Sigdalnum mikla í Kenía.

Rannsóknin leiðir í ljós mögulegan félagshagrænan ábata þess að nýta jarðhitaauðlindir í Baringo og getur því nýst í áætlanagerð, bæði fyrir fjárfesta og fyrirtæki sem huga að framkvæmdum tengdum jarðhitanýtingu.

Nánari upplýsingar um rannsókn Pacificu má sjá á vef Háskóla Íslands.