Klæddu sig úr öllum fötunum og hlupu í kringum stjórnarráðið

Tveir kviknaktir menn sáust á harðahlaupum á lóð stjórnarráðsins í Lækjargötu í nótt. Á Facebook-síðu lögreglunnar segir að óljóst sé hvað mönnunum gekk til „en þó má fullvíst telja að þeir voru ekki á leið á ríkisstjórnarfund," segir á síðunni.

Vitni, sem sá til strípalinganna, hafði samband við lögreglu, en þegar hún kom á vettvang voru mennirnir á bak og burt. Að sögn þess sem tilkynnti athæfði höfðu hinir allsberu klætt sig úr fötunum í biðskýli sem er gegnt stjórnarráðinu, gengið yfir götuna og síðan hlaupið um lóðina.

„Eftir uppátækið fóru mennirnir aftur í biðskýlið og klæddu sig í spjarirnar áður en þeir hurfu sjónum. Athæfi þeirra er ekki til eftirbreytni og er m.a. brot á lögreglusamþykkt.

Hitt ætti líka öllum að vera ljóst að það að hlaupa um nakinn í frosti getur auðveldlega komið manni í rúmið með slæmt kvef og mikinn hita!"