Um 80% hafa dregið uppsögn tilbaka

Erna Einarsdóttir, starfsmannastjóri Landspítalans, segir um 80% þeirra hjúkrunarfræðinga sem sögðu upp störfum í desember hafa dregið uppsögn sína tilbaka.

Tæplega 300 hjúkrunarfræðingar sögðu upp störfum vegna óánægju með kjör sín í desember. Áttu uppsagnirnar að taka gildi um mánaðarmótin. Hjúkrunarfræðingar undirrituðu hins vegar nýjan stofnunarsamning á þriðjudagskvöldið og voru í kjölfarið hvattir til þess að draga uppsögn sína tilbaka.

Draga þurfti uppsögnina tilbaka fyrir miðnætti í gær til þess að fá greiddar 60 þúsund krónur í álagsgreiðslur fyrir nóvember og desember. Erna segist hafa farið yfir tölurnar upp úr hádegi í dag. Um 80% hjúkrunarfræðinga hafi dregið uppsögn sína tilbaka en þá segir hún koma í ljós fyrir helgi hvort einhverjir hafi póstlagt uppsagnir sínar. Hafi þær verið póstlagðar í gær fái hjúkrunarfræðingar áðurnefnda greiðslu.

Erna sagðist í samtali við Vísi í dag aðeins vita um eitt dæmi þess að hjúkrunarfræðingur ætlaði ekki að snúa tilbaka í vinnu. Í samtali við Vísi síðdegis sagði hún einhverja ætla að taka sér umhugsunarfrest til mánaðarmóta. Þar til þá myndi heildartala ekki liggja fyrir.