Lífeyrissjóðirnir að baki fyrirhuguðum kaupum á Íslandsbanka

Það munu vera lífeyrissjóðirnir sem standa að baki hugsanlegum kaupum á Íslandsbanka. Eins og fram hefur komið í fréttum hafa staðið yfir óformlegar viðræður fjárfesta við slitastjórn Glitnis um kaupin á Íslandsbanka. MP banki, sem er að stórum hluta til í eigu Skúla Mogensen, er einn þeirra aðila sem munu taka þátt í fjárfestingunni ef af henni verður. Vísir hefur það hinsvegar eftir áreiðanlegum heimildum að það séu lífeyrissjóðir landsins, í gegnum Framtakssjóð Íslands, sem munu leggja til megnið af kaupverðinu. Vísir hefur óskað eftir viðbrögðum vegna fyrirhugaðra kaupa frá MP banka og Framtakssjóðnum en hvorugur aðilinn hefur viljað láta hafa nokkuð eftir sér opinberlega.

Hafliði Helgason, upplýsingafulltrúi Framtakssjóðsins, segir þó almennt að Framtakssjóðurinn hafi frá stofnun árið 2009 komið að endurreisn og uppbyggingu fjölmargra lykilfyrrirtækja í íslensku atvinnulífi. Að baki sjóðnum standi meðal annars 16 lífeyrissjóðir almennings. „Sjóðurinn hefur lengi horft á fjármálageirann þar sem ljóst er að núverandi eignarhald þjónar ekki langtímahagsmunum samfélagsins og atvinnulífsins," segir hann.

Hann segir að framtíðarskipan og eignarhald fjármálakerfisins sé mikið hagsmunamál allra landsmanna og mikilvægt að úr þeirri stöðu verði leyst og Framtakssjóðurinn hafi hreyft við hugmyndum að því að leysa úr núverandi stöðu. „Þær þreifingar eru skammt á veg komnar og óvarlegt að tjá sig meira um það að svo stöddu," segir hann.

Þrátt fyrir ítrekaðar tilraunir hefur Vísir ekki náð tali af Steinunni Guðbjartsdóttur, formanni slitastjórnar Glitnis, sem á 87% hlut í Íslandsbanka á móti 13% hlut ríkisins.