Þór Saari harðorður í garð Þorgerðar - áminntur fyrir orð sín

Forseti Alþingis áminnti Þór Saari, þingmann Hreyfingarinnar, um að gæta orða sinna í umræðum á Alþingi í dag. Þingmaðurinn gagnrýndi Þorgerði Katrínu Gunnarsdóttur, þingmann Sjálfstæðisflokksins, fyrir ummæli hennar í fjölmiðlum varðandi komu fulltrúa bandarísku Alríkislögreglunnar til Íslands.

Í því sambandi hafði Þorgerður talað um Kanafóbíu af hálfu ríkisstjórnarinnar og meintan stuðning Hreyfingarinnar við stjórnina. Þetta væru dylgjur af hálfu Þorgerðar Katrínar. Hún ætti að biðja bæði innanríkis- og utanríkisráðherra afsökunar á ummælum sínum og Hreyfinguna á dylgjum hennar um hana.

„Það ætti kannski frekar, fyrir háttvirtum þingmanni, að liggja að greiða til baka þær 1700 milljónir sem hún og eiginmaður hennar hafa fengið afskrifaðar áður en hún fer að breiða út ósannindi og dylgjur í þingsal. Þetta er algjörlega ósæmandi og hún á að vita það," sagði Þór Saari í þinginu.

Ásta Ragnheiður Jóhannesdóttir, forseti Alþingis, áminnti þá þingmenn um að þeir virtu ræðutíma og þingsköp.