FH stefnir á riðlakeppni Meistaradeildarinnar

Jón Rúnar Halldórsson, formaður knattspyrnudeildar FH, er í áhugaverðu viðtali við stuðningsmannasíðu FH-inga, fhingar.net. Jón Rúnar var á dögunum endurkjörinn formaður deildarinnar.

Rekstur deildarinnar á síðasta ári gekk vel og skilaði deildin rúmlega 7 milljón króna hagnaði. FH-ingar eru stórhuga eins og Jón Rúnar segir í viðtalinu.

"við höfum mátt búa við aðstöðu sem er ekki í neinu samræmi við stærð deildarinnar né þeim verkefnum sem við þurfum að klára okkur af. Núna sjáum við fram á betri tíð hvað þetta varðar. Eins og allri vita þá tókum við hjá knattspyrnudeild FH okkur til og hrundum í framkvæmd byggingu á Risanum og fórum þar mjóg svo óhefðbundna leið. Nú viljum við halda áfram og byggja á þeirri reynslu sem við höfum af byggingu og rekstri Risans.

Við viljum ráðast í að byggja tvö knatthús, annað 50 x 25 metrar og hitt 115 x 75 metrar sem verður svokallað A hús. Samfara þessu verður núverandi gervigrasvöllur fjarlægður og við komum okkur upp tveimur æfinga- og keppnis grasvöllum í fullri stærð. Að þessu loknu munum við hafa yfir að ráða þeirri aðstöðu sem fullkomlega stenst þá kröfu sem við gerum," segir Jón Rúnar og bætir við að þessar framkvæmdir verði fjármagnaðar með eigin fé, hlutafé og lánum.

Jón Rúnar er bjartsýnn á framtíð Fimleikafélagsins og sér fyrir sér að FH komist í riðlakeppni Meistaradeildarinnar.

Aðspurður hvar hann sjái FH eftir 10-15 segir Jón Rúnar.

"Við verðum á toppnum hér heima og við tökum nokkuð reglulega þátt í riðlakeppni Meistaradeildarinnar. Aðstaðan hér í Krikanum verður fyrir löngu komin í það horf sem ég sé að hún verði. Landsleikir verða leiknir í Krikanum og FH akademían starfar á landsvísu sem og í nánu samstarfi við helstu félög í Skandinavíu."

Viðtalið í heild sinni má lesa hér.