Öruggir upp þó sjö umferðir séu eftir

Arnór Þór Gunnarsson skoraði þrjú mörk fyrir Bergischer þegar liðið lagði HC Erlangen 23:15 á útivelli í gærkvöldi. Bergischer hefur tryggt sér sæti í efstu deild þó enn séu sjö umferðir eftir.

Arnór er ekki eini Íslendingurinn sem hefur ástæðu til að fagna tíðindunum. Björgvin Páll Gústavsson, markvörður Magdeburg, gengur til liðs við Bergischer í sumar. Hann verður því áfram í Bundesligunni á næstu leiktíð.

Hannes Jón Jónsson skoraði sjö mörk fyrir Eisenach sem lagði HSG Nordhorn-Lingen. Liðsmenn Aðalsteins Eyjólfssonar eru í 3. sæti deildarinnar með þriggja stiga forskot á næsta lið.

Því gæti vel farið svo að þrjú Íslendingalið fari upp um deild.