Fyrrum stjórnendur Nyhedsavisen stefna Gunnari Smára

Danirnir Svenn Damm og Morten Nissen Nielsen hafa stefnt Gunnari Smára Egilssyni og tryggingafélaginu Sjóvá fyrir Héraðsdóm Reykjavíkur. Svenn Damm var stjórnarformaður danska fríblaðsins Nyhedsavisen en Morten var framkvæmdastjóri þess.

Þeir krefjast þess að skaðabótaskylda verði viðurkennd þar sem þeir vilja meina að Gunnar Smári hafi verið umboðslaus þegar hann gerði við þá hluthafasamning árið 2006, þegar Gunnar Smári var framkvæmdastjóri Dagsbrúnar. Nyhedsavisen fór á hausinn haustið 2008.

Stefnan nú snýst um að sanna fyrir rétti að Gunnar Smári hafi sannarlega verið umboðslaus þegar hann gerði samning við mennina tvo árið 2006.

Mennirnir undirrituðu samninga um kaup á hlutabréfum í félaginu 365 Media Scandinavia A/S árið 2006. Svenn Damm greiddi 75 þúsund danskar krónur fyrir sinn hlut en Morten 50 þúsund. Fyrirtaka átti að fara fram í málinu í dag en var frestað. Ekki hefur verið ákveðið hvenær aðalmeðferð málsins fer fram.